KHuda-E-Bartar Ne Aasman Ko Zamin Par Mehrban Kiya Hai

Ghulam Husain Sajid

ḳhuda-e-bartar ne asman ko zamin par mehrban kiya hai

magar mire ḳhvab ke nagar ko charagh ne ḳhush-guman kiya hai

suno ki main ne dhari hai sat.h-e-ravan pe ik Dolti imarat

aur ek sham-e-tarab ko shahr-e-malal ka pasban kiya hai

mujhe yaqin hai ye sub.h-e-nau bhi mire sitare ka saath degi

ki main ne ik ism ki madad se ghubar ko asman kiya hai

ye sach hai meri sada ne raushan kiye hain mehrab par sitare

magar miri be-qarar ankhon ne aa.ine ka ziyan kiya hai

nigah-e-nam-nak ko lahu ne kiya hai majbur dekhne par

aur ek rabt-e-ḳhafi ko rasm-e-mughairat ne javan kiya hai

kahin nahin hai masafat-e-umr men kisi ḳhvab ka paḌav

so main ne is be-kanar sahra pe abr ka sa.eban kiya hai

sitar-e-ḳhvab se bhi baḌh kar ye kaun be-mehr hai ki jis ne

charagh aur aa.ine ko apne vajud ka raz-dan kiya hai