ḳhud fāsle hī vasl kī tahrīk ho ga.e
tum duur ho ke aur bhī nazdīk ho ga.e
jab se chhuTā hai haath tirā mere haath se
sab rāste hayāt ke tārīk ho ga.e
jin rāstoñ pe dauḌ ke ham tum chale the saath
tanhā chale to baal se bārīk ho ga.e
un ke baġhair jiinā bhī ik jurm ho gayā
lamhe tamām māñgī huī bhiik ho ga.e
itnā huā hai un kī masīhā.iyoñ kā zikr
bīmār chīḳh uTThe haiñ ki ham Thiik ho ga.e
ham vo nishāna-e-sitam-e-rozgār haiñ
hañsne chale to paikar-e-taz.hīk ho ga.e
‘shā.ir’ ne jab bhī chheḌā ḳhulūs-o-vafā kā zikr
chehre tamām yāroñ ke tārīk ho ga.e