Har sans Mein Shamil Rahte Hain Har KHwab Sanwara Karte Hain

Mustafa Rahi

har saans men shamil rahte hain har ḳhvab sanvara karte hain

kya kya na hamari ḳhatir vo taklif gavara karte hain

sajdon se talafi ho kyunkar hairan-o-pareshan hain ḳhud-sar

vo bojh jo hota hai dil par kis tarah utara karte hain

har haal men hain razi-ba-raza ham ahl-e-yaqin ham ahl-e-vafa

hai kaun hamara tere siva tujh hi ko pukara karte hain

kya janiye kya hai qismat men ai shaḳh-e-nasheman ḳhair tiri

bijli bhi bahut kuchh kahti hai badal bhi ishara karte hain

ik mauj qayamat Dhati hai ik mauj sahara deti hai

tufan hi Dubote hain kashti tufan hi ubhara karte hain

ehsas kahan phenk aa.en ham alfaz kahan se laa.en ham

kis dil se kise samjha.en ham jo kuchh bhi nazara karte hain

jan-baz kahan dil-baz hain sab lekin ye haqiqat hai ‘rahi’

kuchh haar ke jiita karte hain kuchh jiit ke haara karte hain

jo azm-e-amal ke paikar hain vo log hi ‘rahi’ bartar hain

vo be-his kankar patthar hain jo vaqt guzara karte hain