khub-ru sab hain magar hura-shamail ek hai
aur mah-para hain lekin mah-e-kamil ek hai
haq-taala us ke zulfon se bachae al-hazar
samna hai do balaon ka mira dil ek hai
kaun sa rahat-rasan maashuq hai afaq men
dusra bhi afat-e-jan hai jo qatil ek hai
main tadapta huun to kahte hain asiran-e-qafas
zakhm-khurda ham giraftaron men bismil ek hai
jis ka ji chaha chala aaya baghair az ittilaa
aap ki sarkar men bazar-o-mahfil ek hai
shama chalti hai to parvane bhi jal jaate hain saath
vaah kya in ashiq-o-mashuq ka dil ek hai
rind-o-zahid donon puchhenge barabar dekhna
tafarqe un men dorahe tak hai manzil ek hai
us ki zulfon ka tasavvur hai jo har dam dil-nashin
main samajhta huun ki do laila hain mahmil ek hai
jo muarrif kamilon ke thi agar hoti vo aaj
ham ko bhi kahte ye apni fan men kamil ek hai
‘bahr’ apni bhi fasahat jante hain ahal-e-fahm
dusre ham hain agar sahban-o-i.l ek hai