Allama Iqbal
khirad ke paas khabar ke siva kuchh aur nahin
tira ilaaj nazar ke siva kuchh aur nahin
har ik maqam se aage maqam hai tera
hayat zauq-e-safar ke siva kuchh aur nahin
giran-baha hai to hifz-e-khudi se hai varna
guhar men ab-e-guhar ke siva kuchh aur nahin
ragon men gardish-e-khun hai agar to kya hasil
hayat soz-e-jigar ke siva kuchh aur nahin
urus-e-lala munasib nahin hai mujh se hijab
ki main nasim-e-sahar ke siva kuchh aur nahin
jise kasad samajhte hain tajiran-e-farang
vo shai mata-e-hunar ke siva kuchh aur nahin
bada karim hai ‘iqbal’-e-be-nava lekin
ata-e-shola sharar ke siva kuchh aur nahin
Leave a Reply