ḳhilqat-e-shahr to kahne ko fasane mange
meri rusva.i ke kya kya na bahane mange
main use roz na.e zaḳhm dikha.un phir bhi
dil-e-be-mehr vahi dard purane mange
ek avara-e-manzil se mohabbat kar ke
tu baḌe shahr men rahne ko Thikane mange
yad-e-mazi ke siva paas mire kuchh bhi nahin
tu meri jaan vo pahle se zamane mange
rat-bhar jagte rahna to nasib apna tha
sone vaala to koi ḳhvab suhane mange
dil-e-nadan se qana.at ki tavaqqo.a hai kise
pa liya un ko to kya aur na jaane mange
Leave a Reply