ḳhazane bhi milen is ke evaz to ham na bechenge
hamara gham hai mazlumon ka gham ye gham na bechenge
kuhistanon se patthar kaaT kar la.enge ham lekin
kisi zalim ke hathon zaḳhm ka marham na bechenge
bala se dhuul phanken ya purane chithḌe pahnen
magar yaaro mata-e-ilm-o-danish ham na bechenge
kisi darbar men ja kar adab aur fan ki surat men
tumhari ambarin zulfon ke pech-o-ḳham na bechenge
hamara inqalab aa.ega jab to kaam aa.ega
abhi apni tamanna ka ujala ham na bechenge
gulistan bech kar khana havas-karon ka sheva hai
chaman vaalo papihon ka tarannum ham na bechenge
bhari mahfil men ‘dauran’ aaj ham phir ahd karte hain
jo hai insaniyat ki aas vo parcham na bechenge
Leave a Reply