Sarshar Siddiqui
ḳhayal hijr-e-musalsal men aa.e hain kya kya
miri vafa ke qadam Dagmaga.e hain kya kya
na sirf husn ki ma.asumiyat pe the ilzam
ḳhulus-e-ishq pe bhi harf aa.e hain kya kya
junun ke naam pe shorish ki tohmaten rakh kar
ḳhirad ne ḳhud bhi to fitne uTha.e hain kya kya
is ik nazar se ba-zahir jo multafit bhi na thi
miri nigah ne paigham paa.e hain kya kya
Leave a Reply