ḳhayal-e-dost na main yad-e-yar men gum huun
ḳhud apni fikr-o-nazar ki bahar men gum huun
ḳhushi se jabr-zada iḳhtiyar men gum huun
ajiib dilkashi-e-nagavar men gum huun
ḳhud apni yad-e-faramosh-kar men gum huun
bahana ye hai tire intizar men gum huun
na mohtasib ki ḳhushamad na mai-kade ka tavaf
ḳhudi men mast huun apni bahar men gum huun
tira jamal bhi dekhunga vaqt aane de
abhi to apne hi a.ina-zar men gum huun
tu hi pukar mira naam le ke ai gham-e-ishq
paḌa hai vaqt gham-e-rozgar men gum huun
na shaam ki hai ḳhabar aur na sub.h ki pahchan
‘siraj’ gardish-e-lail-o-nahar men gum huun
Leave a Reply