main khandaron ki zamin pe kab se bhatak raha huun
qadi;m raton ki tuuti qabron ke maile katbe
dinon ki tuuti hui saliben giri padi hain
shafaq ki thandi chitaon se raakh ud rahi hai
jagah jagah gurz vaqt ke chuur ho gae hain
jagah jagah dher ho gai hain aziim sadiyan
main khandaron ki zamin pe kab se bhatak raha huun
yahin muqaddas, hatheliyon se giri hai mehndi
diyon ki tuuti hui laven zang kha gai hain
yahin pe mathon ki raushni jal ke bujh gai hai
sapat chehron ke khali panne khule hue hain
huruf ankhon ke mit chuke hain
main khandaron ki zamin pe kab se bhatak raha huun
yahin kahin zindagi ke maani gire hain aur gir ke kho gae hain
Leave a Reply