Kausar Siddiqi
ḳhanda-e-gul men bhi poshida fughan ho jaise
shaḳh-e-gul anjuman-e-nauha-garan ho jaise
aap ne kah di vahi baat jo munh par thi mire
aap ke munh men bhi meri hi zaban ho jaise
aisa lagta hai shahanshah-e-jahangir huun main
malika-e-aliya tum nuur jahan ho jaise
kuchh ajab tarz ki is saal jali hai holi
zinda lashon ki chitaon ka dhuan ho jaise
vaqt ke dasht-e-masafat ka hai mausam kaisa
sab ki ankhon men bhara talḳh dhuan ho jaise
bujhti sham.on ka bhi matam nahin karta koi
zindagi anjuman-e-zinda-dilan ho jaise
Leave a Reply