Hasnain Aqib
ḳhana-e-dil ki mo.attar bhi bahut lagta hai
teri yadon se munavvar bhi bahut lagta hai
garche halka sa dhundlaka hai tasavvur bhi tira
band ankhon ko ye manzar bhi bahut lagta hai
sochte hain ki jiyenge tujhe ji bhar ke magar
zindagi tujh se hamen Dar bhi bahut lagta hai
puchh ham se ki haqiqat men hai kya tera vajud
tere shanon pe ye ik sar bhi bahut lagta hai
farq kuchh bhi nahin ehsas-e-tashaḳhḳhus ke siva
darmiyan apne ye antar bhi bahut lagta hai
ham qana.at pe guzar karte hain ‘aqib’ ham ko
kachchi divaron ka ik ghar bhi bahut lagta hai
Leave a Reply