Azad Gulati
ḳhala-e-zehn ke gumbad men gunjta huun main
ḳhud apne ahd-e-guzishta ki ik sada huun main
sameT laata huun moti tumhari yadon ke
jo ḳhalvaton ke samundar men Dubta huun main
tumhen bhi mujh men na shayad vo pahli baat mile
ḳhud apne vaste ab koi dusra huun main
jo de sako to ḳhunuk saa.e do mohabbat ke
ḳhayal-o-ḳhvab ki duniya men jal raha huun main
vo ḳhud mujhi men kahin kho gaya na ho ‘azad’
jise ḳhala-e-zamana men DhunDta huun main
Leave a Reply