Badiuzzaman Khawar
khaḌa tha kaun kahan kuchh pata chala hi nahin
main raste men kisi moḌ par ruka hi nahin
hava.en tez thiin itni ki ek dil ke siva
koi charagh sar-e-rahguzar jala hi nahin
kahan se ḳhanjar-o-shamshir azmata main
mire adu se mira samna hua hi nahin
dukhon ki aag men har shaḳhs jal ke raakh hua
kisi gharib ke dil se dhuan uTha hi nahin
hamara shahr-e-tamanna bahut hasin tha magar
ujaḌ ke rah gaya aisa ki phir basa hi nahin
vo ban gaya mira naqid pata nahin kyuun kar
mira kalam to us ne kabhi paḌha hi nahin
main apne daur ki avaz tha magar ‘ḳhavar’
kisi ne bazm-e-jahan men mujhe suna hi nahin
Leave a Reply