Baqi Siddiqui
ḳhabar kuchh aisi uḌaa.i kisi ne gaanv men
udaas phirte hain ham bairiyon ki chhanv men
nazar nazar se nikalti hai dard ki Tisen
qadam qadam pe vo kanTe chubhe hain paanv men
har ek samt se uḌ uḌ ke ret aati hai
abhi hai zor vahi dasht ki havaon men
ghamon ki bhiiḌ men ummid ka vo aalam hai
ki jaise ek saḳhi ho ka.i gadaon men
abhi hai gosh bar-avaz ghar ka sannaTa
abhi koshish hai baḌi duur ki sadaon men
chale to hain kisi aahaT ka aasra le kar
bhaTak na jaa.en kahin ajnabi fazaon men
dhuan dhuan si hai kheton ki chandni ‘baqi’
ki aag shahr ki ab aa ga.i hai gaanv men
Leave a Reply