kaun dekhe meri shaḳhon ke samar TuuTe hue
ghar se bahar raston men hain shajar TuuTe hue
luT gaya din ka asasa aur baaqi rah ga.e
shaam ki dahliz par laal o guhar TuuTe hue
yad-e-yaran dil men aa.i huuk ban kar rah ga.i
jaise ik zaḳhmi parinda jis ke par TuuTe hue
raat hai aur aati jaati sa.aten ankhon men hain
jaise a.ine bisat-e-ḳhvab par TuuTe hue
abgine pattharon par sar-nigun hote ga.e
aur ham bach kar nikal aa.e magar TuuTe hue
mil ga.e miTTi men kya kya muntazir ankhon ke ḳhvab
kis ne dekhe hain sitare ḳhaak par TuuTe hue
vo jo dil ki mamlikat thi babari masjid hui
bastiyan sunsan ghar viran dar TuuTe hue
Leave a Reply