Kaun Hai Kis Ne Pukara Hai Sada Kaise Hui

Sarmad Sahbai

kaun hai kis ne pukara hai sada kaise hui

ye kiran tariki-e-shab se riha kaise hui

ek ik pal men utar kar sochta rahta huun main

nuur kis ka hai mire ḳhuun men ziya kaise hui

ḳhvahishen aa.en kahan se kyuun uchhalta hai lahu

rut hari kyunkar hui pagal hava kaise hui

us ke jaane ka yaqin to hai magar uljhan men huun

phuul ke hathon se ye ḳhush-bu juda kaise hui

vo macha hai ghul ki barham ho ga.i hain suraten

kaun kis kis se ye puchhega ḳhata kaise hui

jism o jaan ka fasla hai hasil-e-gard-e-safar

justuju-e-zindagi tera pata kaise hui

hans diya tha sun ke vo ‘sarmad’ bas itna yaad hai

baat us ke samne lekin ada kaise hui