kasni rang ke ḳhvabon se nikal aa.i huun
miThe paani ke sarabon se nikal aa.i huun
tu ne jaate hue ik baar bhi dekha na use
vo jo kahti thi azabon se nikal aa.i huun
barguzida thi tahajjud bhi na chhoḌa karti
aur ab saare hisabon se nikal aa.i huun
aas thi diid ki jo kaasa liye phirti thi
main javani ke azabon se nikal aa.i huun
mere atraf men sab log bahut achchhe hain
dekh main saare ḳharabon se nikal aa.i huun
shab-ba-shab jaag ke paḌhti huun risale dil ke
ab main bachpan ki kitabon se nikal aa.i huun
haath men chuḌi nahin paaon men pazeb nahin
ishq-zadi thi gulabon se nikal aa.i huun
Leave a Reply