kasa-leson ne jo thi nazr utari teri
vahi le Duubi tujhe hasht-hazari teri
puchha ja.ega daur-e-humayuni ka
ru-ba-kar aaj hai sarkar se jaari teri
us ka didar hama-vaqt ibadat meri
aankh ne dil pe jo tasvir utari teri
ham ne har samt bichha rakkhi hain ankhen apni
jaane kis samt se aa jaa.e savari teri
tark-e-ulfat ka irada hai musammam us ka
kaam aa.i hi nahin minnat-o-zari teri
zarb-e-paiham ka tasalsul na abhi toḌ ‘sadid’
ik na.i zarb bhi ho sakti hai kaari teri
Leave a Reply