Asad Rizvi
kanpte honTon pe alfaz purane rakh le
koi afsana bana kuchh to bahane rakh le
agle mausam ke to kuchh aur hi qisse honge
apne hisse men vahi biite zamane rakh le
ḳhvab ke shahr men bhaTkega ḳhayalon ka safir
meri tasvir mira ḳhat bhi sirhane rakh le
shabnami dhuup ke anchal men sitare hain bahut
chandni ankhon men kuchh phuul suhane rakh le
apne honTon ki hansi mangne vaale sab hain
apni palkon pe ‘asad’ ashk ke daane rakh le
Leave a Reply