kanon men nachti thi kisi bansuri ki lahr
anchal men bhar ke laa.e the ham chandni ki lahr
phir tiir kas raha tha mire dil ki siidh men
taraj kar ga.i mujhe sharmindagi ki lahr
dariya ko kis ke hijr ne pamal kar diya
phir chand raat men uThi divangi ki lahr
patthar tarashte the tiri suraton ke ham
aur sar men jagti thi tiri bandagi ki lahr
phir hijr zindagi men qarine se aa gaya
muskan men dabi rahi afsurdagi ki lahr
kuchh ishq meri fahm se aage guzar gaya
kuchh ḳhaak men bikharti ga.i zindagi ki lahr
ye zindagi dhanak si khuli aur bujh ga.i
pichhe thi ek miTti hui ruḳhsati ki lahr
bistar laga ga.e hain andhere makan men
shayad ‘sahar’ yahin ho kahin raushni ki lahr
Leave a Reply