Kaise Tahalta Hai Chand

Sara Shagufta

kaise tahalta hai chand asman pe

jaise zabt ki pahli manzil

avaz ke alava bhi insan hai

ankhon ko chhu lene ki qimat pe udaas mat ho

qabr ki sharm abhi baaqi hai

hansi hamari maut ki shahadat hai

lahad men paida hone vaale bachche

hamari maan aankh hai

qabr to mitti ka makr hai

phir parinde suraj se pahle kisi ka zikr karte hain

avaz ke alava bhi insan hai

tuute ho

zara aur lahu angar karo

ki main ek be-libas aurat huun

aur jitni chahun ankhen rakhti huun

main ne avaz ko tarasha hai

hai koi mera mujassama banane vaala

apni qismat pe udaas mat ho

maut ki sharm abhi baaqi hai

mujhe chadar dene vaale

tujhe haya tak dukh lag jaaen

mujhe lafz dene vaale

kaash aurat bhi janaze ko kandha de sakti

har qadam zanjir maalum ho raha hai aur mera dil tah kar ke rakh diya

gaya hai shor mujhe lahuluhan kar raha hai main

apni qaid kaat rahi huun aur is qaid men kabhi

haath kaat kar phenk deti huun kabhi

avaz kaat kaat kar phenk rahi huun

mera dil daldal men rahne vaala kiida hai aur main qabr se

dhutkari hui laash

sadandi hi sadand se meri ankhon ka

zaiqa bad-ruh ho raha hai

aur main insan ki pahli aur akhiri ghalati par dum hilae

bhaunkti ja rahi huun

main jab insan thi to chor ki aas tak na thi main

ankhon men salib aur dil men apni laash

liye phirti huun

sachchaiyon ke zahr se mari huun

lekin duniya gorkan ko dhundhne gai hui hai

vo mujhe abad karta hai aur abad kahta hai

main hari-bhari pyaas se zarkhez ho jaati huun

aur phulon ko mitti men dabane lagti huun

dard mere azhdahe ka naam hai

aur saanp ki bhuuk mera ghar hai