Sufi
kaise rakhenge sar pe kisi ka udhar ham
qarz-e-vafa men karte hain sar ka shumar ham
afsos isi chaman men hue be-viqar ham
jis ko ki chahte rahe divana-var ham
alfaz madah-khvan the qalam the bike hue
kaise tarash lete koi shah-kar ham
milna hamara khaak men zaaea na jaega
de jaenge chaman ko shuur-e-bahar ham
koi sipar bacha na sakegi huzur ko
talvar se sukhan ki karenge jo vaar ham
ai zindagi na ham se chhupa raz-e-zindagi
har saans men hain tere hi aina-dar ham
dalen ab ek aur rivayat ki dagh-bel
dushman pe ai ‘niyaz’ karen e’tibar ham
Leave a Reply