Ravish Siddiqi
kahne ko sab fasana-e-ghaib-o-shuhud tha
dar-parda isti.ara-e-shauq-o-numud tha
samjha na bul-havas kise kahte hain intizar
nadan asir-e-kasmakash-e-der-o-zud tha
kya ashiqi men hausla-e-marg-o-zindagi
ḳhvab o ḳhayal marhala-e-hast-o-bud tha
socha tha mai-kada hi sahi gosha-e-najat
dekha to ik hujum-e-rusum-o-qayud tha
jaan shad-kam-e-bosa-e-pa-e-sanam hui
kitna buland tala-e-zauq-e-sujud tha
ye ishq tha ki jis ne diya rang-e-shola-tab
aalam tamam naqsh-e-sukut-o-jumud tha
ai dost ab vo daur-e-ta.ammul guzar chuka
jab daman-e-nazar pe ghubar-e-hudud tha
shab ham ghazal-sara the ‘ravish’ bazm-e-naz men
sham-e-adab-shanas ke lab par durud tha
Leave a Reply