Irfan Sattar
kahe deta huun go hai to nahin ye baat kahne ki
tiri ḳhvahish nahin dil men zyada der rahne ki
bacha kar dil guzarta ja raha huun har ta.alluq se
kahan us aable ko taab hai ab choT sahne ki
rag-o-pai men na hangama kare to kya kare aḳhir
ijazat jab nahin is ranj ko ankhon se bahne ki
bas apni apni tarjihat apni apni ḳhvahish hai
tujhe shohrat kamane ki mujhe ik sher kahne ki
jahan ka huun vahin ki raas aa.egi faza mujh ko
ye duniya bhi bhala koi jagah hai mere rahne ki
jo kal ‘irfan’ par guzri suna kuchh us ke baare men
ḳhabar tum ne suni tufan men dariya ke bahne ki
Leave a Reply