kahan ga.i ehsas ki ḳhushbu fana hue jazbat kahan
ham bhi vahi hain tum bhi vahi ho lekin ab vo baat kahan
mausam ne angḌa.i li to muska.e kuchh phuul magar
man men dhuum macha de ab vo rangon ki barsat kahan
mumkin ho to khiḌki se hi raushan kar lo ghar-angan
itne chand sitare le kar phir aa.egi raat kahan
ḳhvabon ki tasviron men ab aao bhar len rang naya
chand samundar kashti ham tum ye jalve ik saath kahan
ik chehre ka aks sabhi men DhunD raha huun barson se
lakhon chehre dekhe lekin us chehre si baat kahan
chamak damak men Duub ga.e hain pyaar vafa ke asli rang
‘dev’ jahan valon men ab vo pahle se jazbat kahan
Leave a Reply