Kah Rahe the Log Sahra Jal Gaya

kah rahe the log sahrā jal gayā

phir ḳhabar aa.ī ki dariyā jal gayā

dekh lo maiñ bhī huuñ merā jism bhī

bas huā ye hai ki chehra jal gayā

mere andāze kī nisbat vo charāġh

kam jalā thā phir bhī achchhā jal gayā

short circuit se uḌiiñ chiñgāriyāñ

sadr meñ ik phūl-vālā jal gayā

aag barsī thī badī ke shahr par

ik hamārā bhī shanāsā jal gayā

maiñ to sho.aloñ meñ nahāyā thā ‘faroġh’

duur se logoñ ne samjhā jal gayā

Leave a Comment