kaafi nahin ḳhutut kisi baat ke liye
tashrif la.iyega mulaqat ke liye
duniya men kya kisi se kisi ko gharaz nahin
har koi ji raha hai faqat zaat ke liye
ham bargah-e-naz men us be-niyaz ki
paida kiye ga.e hain shikayat ke liye
hain pattharon ki zad pe tumhari gali men ham
kya aa.e the yahan isi barsat ke liye
apni taraf se kuchh bhi unhon ne nahin kaha
ham ne javab sirf savalat ke liye
raushan karo na shaam se pahle charagh-e-jam
din ke liye ye chiiz hai ya raat ke liye
mahnga.i rah-e-rast pe le aa.i khinch kar
bachti nahin raqam buri adat ke liye
karne ke kaam kyuun nahin karte ‘shu.ur’ tum
kya zindagi mili hai ḳhurafat ke liye
Leave a Reply