Aftab Iqbal Shamim
kabhi khud ko dard-shanas karo kabhi aao na
mujhe itna to na udaas karo kabhi aao na
miri umr-sarae mahke hai gul-e-hijran se
kabhi aao aa kar baas karo kabhi aao na
mujhe chand men shakl dikhai de jo duhai de
koi chara-e-hosh-o-havas karo kabhi aao na
isi gosha-e-yad men baitha huun kai barson se
kisi raft-guzasht ka paas karo kabhi aao na
kahin ab-o-hava-e-tishna-labi mujhe maar na de
use barkha ban kar raas karo kabhi aao na
sada aate jaate mausam ki ye gulab-ruten
koi der hain ye ehsas karo kabhi aao na
Leave a Reply