kabhi jo ankhon men pal-bhar ko ḳhvab jagte hain
to phir mahinon musalsal azaab jagte hain
kisi ke lams ki tasir hai ki barson ba.ad
miri kitabon men ab bhi gulab jagte hain
burai kuchh to yaqinan hai be-hijabi men
magar vo fitne jo zer-e-naqab jagte hain
sitam-shi.aron hamara tum imtihan na lo
hamare sabr se sad inqalab jagte hain
hamen ḳhud apni sama.at pe sharam aati hai
ki mimbaron se ab aise ḳhitab jagte hain
ye niind leti hai ‘aḳhlaq’ vo ḳhiraj ki bas
jo ḳhuub sote hain ho kar ḳharab jagte hain
Leave a Reply