kabhi bahar kabhi gul kabhi subu Thahri
vo aankh jo kisi jannat ki ab-ju Thahri
rusum-e-dard nibha.en ki aap ko chahen
yahi to shart-e-mulaqat du-badu Thahri
har ek pal men hazaron Thahar ga.iin sadiyan
nasim-e-sub.h-e-tamanna magar na tu Thahri
labon ki narm lapeTon men ghulti ghulti shafaq
kahin lahu kahin rangini-e-subu Thahri
dar-e-firaq pe dam-bhar ko nik.hat-e-sahari
tire ḳhiram ki manind hu-ba-hu Thahri
tumhara lams mo.attar tumhara jism bahar
yahi to bahs gulabon ke ru-ba-ru Thahri
Leave a Reply