kab talak shadabi-e-fikr-o-nazar kaam aa.egi
giile kapḌe se hava paani uḌa le ja.egi
bhagte ghoḌe ki rasen khinchne se fa.eda
Dubte suraj ki kya raftar kam ho ja.egi
zehan par phaila rakhe hain jhinguron ne da.ere
aaj jo bhi baat sochunga mujhe uljha.egi
tak rahe hain kis ki janib najam ḳheme gaaḌ kar
dhuup niklegi to pahle mere ghar men aa.egi
khil uTha huun aaj main bhi us ki surat dekh kar
ye ghaḌi jab aa.egi mujh ko yunhi mahka.egi
fasl suraj men ugi hai tamtamati hai zamin
ye kahani pyaar karne se samajh men aa.egi
jism ki putli ko raushan kar ke duniya se guzar
aankh ḳhvahish ki nazar rakhti hai dhoka kha.egi
zard patte ki tarah be-ghar paḌa huun raah men
zard patte ko koi shaḳh-e-hava apna.egi
miTTiyon ki tah men moti paniyon par da.ere
sochta huun kaun si daulat mire haath aa.egi
saath leti ja hamen bhi Dubte suraj ki dhuup
raat ke gharon men teri yaad ham ko aa.egi
vo bhi ḳhushbu ki tarah ḳhud se alag rahne laga
jaane ye mauj-e-ḳhayal us ko kahan le ja.egi
khil rahi hai ḳhvahishon ki dhuup saare jism men
aankh kholunga to ye tasvir bhi kho ja.egi
bastiyon men jangalon men vadiyon men koh men
meri ḳhushbu meri dhaḌkan meri aahaT ja.egi
kitni tasviren mire andar se ubharengi ‘ḳhalil’
jab tiri avaz kanon se mire Takra.egi
Leave a Reply