kab tak gardish men rahna hai kuchh to bata ayyam mujhe
kashti ko sahil mil jaata aur thoḌa aram mujhe
dasht nahin hai ye to mera ghar hai lekin jaane kyuun
uljha.e rahti hai ik vahshat si sub.h-o-sham mujhe
apni zaat se bahar aana ab to miri majburi hai
varna meri ye tanha.i kar degi bad-nam mujhe
mumkin hai ik din main in rishton se munkir ho ja.un
aur agar aisa hota hai mat dena ilzam mujhe
mere dil ka dard suna to us ki ankhen bhar aa.iin
is se behtar mil nahin sakte apne munasib daam mujhe
zehn ko ye avara sochen kis manzil par le aa.iin
kitni mushkil se yaad aaya aaj tira bhi naam mujhe
niind se israr na kartin shayad meri ankhen bhi
pahle se ma.alum jo hota ḳhvabon ka anjam mujhe
dasht-e-talab se kah do mujh ko meri manzil batla de
maan liya hai ab to sarabon ne bhi tishna-kam mujhe
ik muddat se khoya hua tha main apni hi duniya men
tum ko dekha to yaad aaya tum se tha kuchh kaam mujhe
Leave a Reply