Kab Koi Tujh Sa Aaina-Ru Yan Hai Dusra

kab koi tujh sa aina-ru yaan hai dusra

hai tu tira hi aks numayan hai dusra

puchh us ki mat khabar jise naseh siye tha to

vo dhajjiyan uda ye gareban hai dusra

shakl un ki ye hai jo ki hain mahv-e-jamal-e-yar

shashdar khada hai ek to hairan hai dusra

rukh us ka dekhiyo shab-e-mahtab men koi

goya zamin pe ye mah-e-taban hai dusra

kya dil jigar ki kahiye tamanna-e-vasl men

hasrat bhara hai ek pur-arman hai dusra

vadi-e-ishq men hamen barson yuun hi kate

ik dasht tai kiya ki bayaban hai dusra

tere khiram-e-naz ke sadqe ki kab koi

aisa chaman men sarv-khiraman hai dusra

gham-khvar-o-munis ab tire bimar ke hain yuun

taskin ek de to hirasan hai dusra

‘jurat’ ghazal padh aur ik aisi ki sab kahen

kab is tarah ka koi ghazal-khvan hai dusra

Leave a Comment