kab kaun kahan kis liye zanjir-bapa hai
ye uqda-e-asrar-e-azal kis pe khula hai
kis bhes koi mauj-e-hava saath laga le
kis des nikal jaa.e ye dil kis ko pata hai
ik haath ki duuri pe hain sab chand sitare
ye arsha-e-jan kis dam-e-digar ki ata hai
ahang-e-shab-o-roz ke nairang se aage
dil ek gul-e-ḳhvab ki ḳhushbu men basa hai
ye shahr-e-tilismat hai kuchh kah nahin sakte
pahlu men khaḌa shaḳhs farishta ki bala hai
har soch hai ik gumbad-e-ehsas men gardan
aur gumbad-e-ehsas men dar harf-e-dua hai
ye diid to rudad-e-hijabat hai ‘ali’
vo mah-e-mukammal na ghaTa hai na baḌha hai
Leave a Reply