Kab Faraghat Thi Gham-E-Subh-O-Masa Se Mujhko

kab farāġhat thī ġham-e-sub.h-o-masā se mujh ko

roz o shab kaam rahā āh-o-bukā se mujh ko

pās-e-ḳhātir se na dushman ke sitam kar mujh par

khelnā aatā hai ai dost qazā se mujh ko

haa.e aalam shab-e-furqat mirī māyūsī kā

detī hai maut kī ummīd dilāse mujh ko

thā tirī fitna-ḳhirāmī se ayaañ dil kā ma.aal

bū-e-ḳhūñ aatī hai naqsh-e-kaf-e-pā se mujh ko

ai ‘vafā’ mausam-e-vahshat bhī hai kyā mausam-e-gul

kyuuñ bachāte haiñ gulistāñ kī havā se mujh ko

Leave a Comment