kab faraghat thi gham-e-sub.h-o-masa se mujh ko
roz o shab kaam raha ah-o-buka se mujh ko
pas-e-ḳhatir se na dushman ke sitam kar mujh par
khelna aata hai ai dost qaza se mujh ko
haa.e aalam shab-e-furqat miri mayusi ka
deti hai maut ki ummid dilase mujh ko
tha tiri fitna-ḳhirami se ayaan dil ka ma.aal
bu-e-ḳhun aati hai naqsh-e-kaf-e-pa se mujh ko
ai ‘vafa’ mausam-e-vahshat bhi hai kya mausam-e-gul
kyuun bachate hain gulistan ki hava se mujh ko
Leave a Reply