juyan-e-taza-kari-e-guftar kuchh kaho
tum bhi hue ho kashif-e-asrar kuchh kaho
shisha kahin se laao sharab-e-farang ka
baaqi jo thi hikayat-e-dildar kuchh kaho
jaane bhi do taghayyur-e-alam ki dastan
kis haal men hai nargis-e-bimar kuchh kaho
badal uThe hain chashmak-e-barq-o-sharar hai
munh dekhte ho surat-e-divar kuchh kaho
mutrib ko taaza bait sikhao hua hai narm
guzre kisi tarah to shab-e-tar kuchh kaho
Thahra hua hai vadi-e-gham men ramida vaqt
samjho bhi kuchh nazakat-e-bisyar kuchh kaho
zinda-dilan-e-shauq ne rakkha bahar naam
ik mauj-e-ḳhun ga.i sar-e-gulzar kuchh kaho
aghaz har taghayyur-e-alam ki had hua
us ki gali ka saya-e-divar kuchh kaho
uljhega aaj ji ki hava pech pech hai
banta nahin koi ruḳh-e-guftar kuchh kaho
Leave a Reply