Jurat-E-Ishq Hawas-Kar Hui Jati Hai

Figar Unnavi

jur.at-e-ishq havas-kar hui jaati hai

be-piye tauba gunahgar hui jaati hai

dil hai afsurda to be-rang hai har rang-e-bahar

bu-e-gul bhi ḳhalish-e-ḳhar hui jaati hai

bavajude-ki junun par hain ḳhirad ke pahre

phir bhi zanjir ki jhankar hui jaati hai

har nafas mauj-e-fana tere thapeḌon ke tufail

kashti-e-umr-e-ravan paar hui jaati hai

jo namaz aaj sar-e-dar ada ki main ne

sajda-e-shukr ka me.aar hui jaati hai

jitni asaniyan hoti hain faraham din raat

zindagi utni hi dushvar hui jaati hai

jab se dekha hai kisi ke ruḳh-e-raushan ko ‘figar’

aankh har jalve se bezar hui jaati hai