junun ke dasht men niklen vafa ki had kar den
uTha ke eḌiyan apni daraz qad kar den
mohabbaton ke chaman phir se lahlaha.enge
ye nafraton ke sabhi baab qaid-e-had kar den
tumhare hijr ke mausam jinhen mayassar huun
vo barg-o-bar ki baharon ko mustarad kar den
jo ehtimam-e-baghavat ka pesh-ḳhema huun
ḳhulus-e-dil se vo zulmat ke baab sad kar den
nigah-e-naz se dekhen to bahr-e-azadi
qafas ke saare parindon ko nam-zad kar den
agar huun rishte ujalon se mo’atabar phir to
charagh baḌh ke andheron ki ḳhud madad kar den
hamare shahr men aise bhi log hain ‘anjum’
vo jis ko dekh len us ko hi mustanad kar den
Leave a Reply