Siya Sachdev
jo zimmedariyan qismat ne mere sar rakh diin
to phir nazakaten main ne uTha ke ghar rakh diin
tumhare baad zamane men aur kya dekhen
lo ham ne chehre se ankhen utaar kar rakh diin
phir aaj umr-e-guzishta ki yaad aa.i hai
phir apne maazi ki tasviren dekh kar rakh diin
yaqin hoga hamen ab tumhare hone ka
lo ham ne ungliyan jalte charagh par rakh diin
chhupa.e baiThi huun siine men ek muddat se
vo baten dil ki tire samne agar rakh diin
Leave a Reply