jo tiri bandagi se milta hai
lutf vo kam kisi se milta hai
hai ye kaafi tira mira shajara
ek hi aadmi se milta hai
laakh barham ho vo magar yaaro
phir bhi sha.istagi se milta hai
din ko lagta hai dhuup us ka mizaj
raat ko chandni se milta hai
ab to mujh ko vo meri rag rag men
dauḌti sansani se milta hai
hon mah-o-mehr ya nujum tamam
vo kisi na kisi se milta hai
laakh bhaTkun main zulmaton men mira
ik sira raushni se milta hai
qabil-e-did rang hote hain
jab kabhi sadgi se milta hai
pahle meri ḳhushi se milta tha
ab vo apni ḳhushi se milta hai
shukr-sad-shukr ki mira zahir
halat-e-batini se milta hai
jo mujhe maujib-e-masarrat hai
dard bhi to usi se milta hai
us men har rang uud aaya hai
vo miri sha.iri se milta hai
gulshan-e-dil men jab baharen hon
kaun phir bekali se milta hai
hijr men be-sukun rahta huun
chain bhi hijr hi se milta hai
ab to is zindagi ka har lamha
lamha-e-aḳhiri se milta hai
dekh kar zarf paas aata hai
dard kam hi kisi se milta hai
silsila-ha-e-vus.at-e-sahra
dil ki us tishnagi se milta hai
jab se vo aankh ke frame men hai
jo hai milta usi se milta hai
ai muhaqqiq suragh-e-qatl mira
aḳhirash zindagi se milta hai
roz vo DhunDte hain ‘tahir’ ko
roz us ki gali se milta hai
Leave a Reply