jo rivayat bhuul jaate hain
apni har baat bhuul jaate hain
ahl-e-dil ahl-e-dard ahl-e-karam
de ke ḳhairat bhuul jaate hain
aap aa.en to fart-e-shauq se ham
din hai ya raat bhuul jaate hain
apni miTTi ke ghar bana kar bhi
log barsat bhuul jaate hain
gulsitan men ḳhizan bhi aa.egi
phuul aur paat bhuul jaate hain
yaad rakhte hain aap sab baten
lekin ik baat bhuul jaate hain
jab bhi vo ḳhush-nazar mile ‘rif.at’
gham ke lamhat bhuul jaate hain
Leave a Reply