Jo Rishton Ki Ajab Si Zimmedari Sar Pe Rakkhi Hai

Zia Zameer

jo rishton ki ajab si zimmedari sar pe rakkhi hai

to ab dastar jaisi chiiz bhi Thokar pe rakkhi hai

tiri yadon ki paa.el si khanakti hai mire ghar men

mire kamre ke andar gunjti hai dar pe rakkhi hai

tumhare jism ne pahlu-ba-pahlu jis ko likha tha

vo silvaT jyuun ki tyuun ab bhi mire bistar pe rakkhi hai

tumhare lams ki ḳhushbu abhi tak saath hai mere

mire takiye ke niche hai mire bistar pe rakkhi hai

kahan ki be-qarari bekali aur kaisi bechaini

hatheli aap ki jab is dil-e-muztar pe rakkhi hai

ab is ashuftagi men kya bata.en silsila apna

kabhi jo ḳhandani thi sharafat ghar pe rakkhi hai

kabhi ham us ko dil ka bojh samjhe hain na samjhenge

jo gaThri zimmedari ki hamare sar pe rakkhi hai