Jo Rahi So Be-Khabari Rahi

mujhe bas ek janib dekhte rahne ki aadat thi

bhala kya tha mire is dusri janib

mujhe kaise khabar hoti

miri sab arzuen khvahishen idrak ke manzar

mire is ik taraf the

dusri janib khala tha

ya mujhe aisa laga tha

koi rauzan daricha koi darvaza

agar tha bhi to bas

us ek hi janib khula tha

jis taraf khvabon ka rasta tha

mujhe bas ek janib dekhte rahne ki aadat thi

jahan tum the

magar ye baat bhi to hai

tumhare us taraf kya tha

mujhe kaise khabar hoti

mujhe ye bhi khabar kab thi

mujhe kuchh bhi pata kab tha

Leave a Comment