jo nahin us jahan rote hain
hasil-e-ra.egan ko rote hain
dukh zamin ka to baanT sakte nahin
aur zaman-o-makan ko rote hain
reza reza paḌa hai ankhon men
gham ke koh-e-giran ko rote hain
dil-girafta ḳhamosh raton men
shor-ha-e-sagan ko rote hain
mausamon ki bahar men ham sab
apni apni ḳhizan ko rote hain
ja nikalte hain gham zamanon men
niind men raftagan ko rote hain
vaqt ke be-nava musafir ham
an-suni dastan ko rote hain
kashtiyan bhar ga.iin samundar se
ham abhi badban ko rote hain
ham zaminon pe rengne vaale
kis liye asman ko rote hain
kuchh bhi hota nahin jo rone ko
be-sabab in-o-an ko rote hain
apne malbe pe baiTh kar ‘nasir’
dar-o-divar jaan ko rote hain
Leave a Reply