jo meri aḳhiri ḳhvahish ki tarjuman Thahri
vo ek gharat-e-jan hi mata-e-jan Thahri
ye gham nahin ki mira ashiyan raha na raha
ḳhushi ye hai ki yahin barq be-aman Thahri
vo teri chashm-e-fusun-saz thi ki mauj-e-karam
vahin vahin pe main Duuba jahan jahan Thahri
kabhi the us men miri zindagi ke hangame
vo ik gali jo guzargah-e-dushmanan Thahri
vahi thi ziist ka hasil vahi thi lutf-e-hayat
vo ek sa.at-e-rangin jo be-karan Thahri
main us ko bhuul bhi ja.un to kis tarah ‘nasir’
jo shart-e-ḳhas mire un ke darmiyan Thahri
Leave a Reply