Jo Mere Dil Mein Hai Logon Se Chhupaun Kis Tarah

Khalid Shirazi

jo mire dil men hai logon se chhupa.un kis tarah

kanch ke is shahar ko ‘ḳhalid’ bacha.un kis tarah

tu to pahle se bhi ab ma.asum hai mere liye

main tiri izzat ko miTTi men mila.un kis tarah

apna paikar bhi mujhe zindan nazar aane laga

kashmakash men huun riha.i ḳhud se pa.un kis tarah

main kisi ke adl ki TuuTi hui zanjir huun

mujh pe jo biiti hai duniya ko bata.un kis tarah

dekh kis aks-e-muqabil jism patthar ho gaya

chhoḌ kar ab a.ina-ḳhane ko ja.un kis tarah

jagte lamhon ki zanjiron men huun jakḌa hua

ḳhvab ki divar ke saa.e men aa.uun kis tarah

ratjagon ke shahar men ja kar use kya ho gaya

vo to kahta tha ki main tujh ko bhula.un kis tarah