Sahir Ludhianvi
jo lutf-e-mai-kashi hai nigaron men aaega
ya ba-shuur bada-gusaron men aaega
vo jis ko khalvaton men bhi aane se aar hai
aane pe aaega to hazaron men aaega
ham ne khizan ki fasl chaman se nikal di
ham ko magar payam baharon men aaega
is daur-e-ehtiyaj men jo log ji liye
un ka bhi naam shoabada-karon men aaega
jo shakhs mar gaya hai vo milne kabhi kabhi
pichhle pahar ke sard sitaron men aaega
Leave a Reply