jo lazzat-e-ashna-e-dard-e-hijran hote jaate hain
sar-e-ku-e-tamanna vo ghazal-ḳhvan hote jaate hain
safina Duub hi ja.ega ab bahr-e-talatum men
habab-asa harif-e-mauj-e-tufan hote jaate hain
vahi bante hain baa.is dosto betabi-e-dil ka
mohabbat men jo nazdik-e-rag-e-jan hote jaate hain
mata-e-dil jinhen saunpi thi main ne rah-e-ulfat men
ta.ajjub hai vahi gharat-gar-e-jan hote jaate hain
dabistan-e-mohabbat men ik aisa daur aata hai
ki auraq-e-kitab-e-dil pareshan hote jaate hain
asar bad-e-fana hone laga hai jazba-e-dil ka
vo mujh ko dafn kar ke ab pasheman hote jaate hain
junun men bhi ‘muzaffar’ hai hamen pas-e-adab har-dam
ba-qadr-e-zarf mahv-e-husn-e-janan hote jaate hain
Leave a Reply