jo kuchh kiya so ham ne kiya apni chaah se
ab shikva kijiye na kuchh us rashk-e-mah se
ashiq ke rozgar ko us ne siyah kiya
kakul se khat se zulf se khali siyah se
tab-o-tavan-o-din-o-dil-o-aql-o-sabr-o-hosh
vo shokh mujh se le gaya sab ik nigah se
ki charkh kaj-ravish ne ye kya kaj-adai kharch
jo ham ko ashna kiya us kaj-kulah se
kasrat nujum ki na falak par ye samjhiyo
ghirbal ho gaya hai mire tir-e-ah se
us shokh khud-pasand se puchhe koi sahi
sabit hua hai qatl mira kis gunah se
pyare abas hue ho ‘jahandar’ se khafa
be-dil na ho tum aise dili-khair-khvah se